علامة فى حياتك

السلام عليكم ورحمة الله وبركاتة

مش قادرة اقولكم وحشتونى بس خلونى اقول انا وحشتنى

الايام اللى فاتت وغالبا القليلة القادمة ملونة فى قلبى بلون رمادى اكرهه

ومعنديش ادنى فكرة ليه!!!

ولأن السكاكين بتكتر لما (.......) بيقع

قرر المطرب عمرو مصطفى انه ينزل اغنية فى الألبوم الجديد اسمها علامة فى حياتك

وبمناسبة عمرو مصطفى انا من الناس اللى اصلا مفيش عمار بينى وبينه كمطرب

لكن الأغنية فجأة فى الظروف القاتمة اللى انا عايشاها تقريبا خلصت على شوية الأمل اللى كانوا عندى

الله يسامحه بقى والغريبة انى ممكن ما اسمعاش لكن هيهات ده انا ملكة تعذيب الذات لازم اكمل للآخر.....

غريبة جدا انى اكتب بوست اربط فيه بين مشاعرى وحالتى النفسية وعمرو مصطفى لكن..........!!!

هو ده اللى بفكر فيه دلوقتى وانا حبيت اتكلم بدل ما اتنقط او اتشل

No body stupid that much

I'm one of those people who used to check their e-mail daily

and sometimes many times a day

the most bothering thing I always see in my e-mail is those silly e-mails

which telling me that all of a sudden I just won the amazing lottery of any fucking where

I receive about 5 to 7 e-mails ber day

which means that I'm reacher than Bill Gates him self!!!

why any body thinks that I might be stupid that much to believe such things like this

I wish that one day they will stop sending me this kind of kids stuff

sorry for bothering all of u but I had to express my anger

موجز الأنباء

كما يحدث عادة تم اختفاء العريس المنتظر فى ظروف غامضة

لكن الأغرب هو اختفاء صديقتى الأنتيخ بيرو فى ظروف أغمض وأغمض وأغمض......!!!

اشى خيال يا نااااس.......

النهاردة حصلتلى حاجة اغرب من الخيال

الاول خلونى احكيلكوا عنى شوية علشان تعرفوا مدى غرابة اللى حصل ده

انا فتاة مصرية ابلغ من العمر 30 ربيعا

عاااااااااانس عارفة من غير تريقة

ظروفى ملطشة الى ابعد الحدود

ورغم كده ولانى من اسرة اجتماعيا ظريفة جدا و ماديا تحت الصفر

بس النعرة بتاعة زمان عامللهم كاللو فى دماغمهم كان لى نصيب فى ان يتقدم

لى كم عريس كده على ما قسم فى الماضى طبعا

ولكن لانى لم ارث من الاسرة الارستوقرطية دى الا النعرة الكدابه

بتاعتة اهاليهم

طبعا كنت بتحجج وبتدلع

ومش عاجبنى اى حد لو بس كنت اعرررررف !

المهم انى الظاهر زودتها شويتين تلاتة لحد ما انقطع تماما دخول اى عريس حتى فى المربع السكنى اللى انا عايشة فيه

انقرضوا تماما

لحد ما ابتديت اسستم حياتى على انى مكمله بقى على كده وزى ماتيجى تيجى واستمر الحال على كده كم سنة يعنى .......

واذ فجأتتتتن من ساعتين كده اتصلت بى صديقتى الانتيخ لتنبأنى بخبر فظيع شنيع مريييييييع......

بيرو جايبالى عريس اتشنكل كده فى سكتها هى جوزها

عريس لقطة بعد ما كان اخر عرسانى المأسوف على شبابهم السابقين مدرس تاريخ بجرنال وشرززز وبطيخة

اسمعوا بقى

مواصفات العريس :

من غير قر والنبى ولا حقد ولا حسد اصل انا منحوسة خلقة يعنى

مسلم امريكى متدين , على خلق 31 سنة , زى القمرعلى حد قولهم انا لسه ماشفتوش

بس البت بيرو عارفة زوقى يعنى لازم وحتما يكون موزز جامد جدا

المهم باقى مواصفات الباشا:

مليونير يمتلك شقة بعباس العقاد مساحتها 500 متر الله اكبر من عينيكوا

كل مواصفات العروسة اللى طالبها انها تكون على خلق مسلمة من اسرة طيبة

انا طبعا كنت هاسورق يغمى على يعنى لما سمعت الكلام ده

واحلفها اوعى يكون مغرز من اللى بتعمليهم فى تقوللى والله جد والله جد

فانا طبعا مازلت مش مصدقة

يعنى ولما هو مسكر كده وخارق لكل مواصفات الطبيعة

أيه يعنى اللى مخليه يوسط حد يجوزة!!!!

ده لو بس اتمشى كده شوية هايرجع بدشيليون رقم كده بعد المليون بكتيير عروسة

ياللا مش هانقاطع........

انا بس حبيت احكيلكوا قبل مايختفى فى ظروف غامضة زى اللى قبله كلهم

على اعتبار ان ده حدث لا يتكرر كثيرا فى حياتى

خصوصا فى الاربع سنوات الماضية

انا بقى رايحة اشوف المسكر العسل ده اللهم ثبت اقدامه

يا اما بكرة يا اما بعد بكره بالكتير

ادعولى كده من قلبكم بلاش نفسنة وحقد وضغائن ان ربنا ييسر الامور

اصل انا استوييييت تريقة ونظرات شفقة من كل المحيطين والمحيطات والبحار والانهار والمخلوقات

انتظرونى بقى احكيلكم على توابع هذا الحدث الجليل فى حياتى....

يومان ونوافيكم بالانباء...

للصفيح بريق خاص

أضواء لامعة.. موسيقى صاخبة.. شوارع مزدحمة... وحركة بيع وشراء رائجة لسلع أبدعوا في عرضها لتبهر العيون. ووجوه ضاحكة - أو تحاول أن تكون - ومزيد من التهاني والمجاملات والمشاكسات أحياناً؛ هذه هي ليلة العيد..وأنا أتجول في الشوارع بين الزحام ..يمر شريط الأعياد أمام عيني من عشر سنوات ويزيد.
أتذكر أبي يصطحبني معه إلي قريته..الثوب الجديد.. وكيس الحلوى.الحقيبة الصغيرة التي طالما أصررت علي اقتنائها كل عيد.. أبناء وبنات أعمامي وقرنائي من أهل القرية..اللهو واللعب وإفساد الثوب..التجول مع أبي في الحقول حيث يسمح لي بجمع بعض الثمار أحياناً...وأخيراً الذهاب للعيد... نعم فقد كان العيد لدي أطفال القرية مكان يذهبون إليه.. وكثيرا ما رددت معهم هذه العبارة "الذهاب إلي العيد ".
ما زلت أتذكر ملامح هذا المكان- العيد- الذي لم يتغير من عام لآخر.. ساحة كبيرة بمجرد دخولها تبحث عيناي عن الأرجوحة الخشبية المتهالكة والوحيدة كذلك . وهناك أرى لوحة النيشان.. بائعي الحلوى..الكثير من الألعاب البلاستيكية الرائعة الألوان والرديئة الصنع ..والعربة الخشبية التي تحمل بهجتي ..أراها هناك تحمل كنزي الكبير. وهناك أقف لأعلن عن أهم طقوس العيد اقتناء السلسلة والأساور والخاتم الذي اعتدت أن أختاره محلى بفص من البلاستيك.. وها هنا أشعر أني امتلكت العالم بأسره وعلي كتف أبي أتهدل كورقة متساقطة من شجرتها بمزيج من الإرهاق وفرحة العيد ويدي تتحسس مجوهراتي التي هي من الصفيح .
أفقت من ذكرياتي هذه علي سيارة علي وشك أن تدهسني يقودها بعض الشباب المستهتر لأري أمامي محلاً أنيقاً تتلألأ فيه خواطري.. ولم لا ؟! فلأستعيد فرحة العيد،انتقيت عقداً طويلاً وزوجاً من الأساور وخاتم تتوسطه وردة زرقاء وجميعهم من ماركات عالمية.. وخرجت وكأن شيئاً لم يكن .. ارتديت هذه الأشياء لكنها لم تضف لي الكثير..ومازلت في تجوالي أبحث عن شيء لا أعرفه..هل شاخ القلب فلم يعد يستشعر الفرحة؟... أم أن الفرحة أبت أن تسكن القلوب الجامدة؟...
لست أدري؛
لكن ما أعلمه جيداً أن للصفيح بريق خاص... وأبي في التراب.

مقال لشيماء زايد

أدمى قلبى واجرى نزيف دموعى

فتلك الفتاه انا وهذا الاب ابى

وكم اشتاق لحلى الصفيح ولان اذهب للعيد كما كنت دوما اذهب

خدنى على بلادى

لانى بحب فيروز حب لا يوصف تقريبا بسمعها كل يوم

ومعرفش ليه بسمعها لوحدى كأنى مش عايزة حد يعرف قد ايه بحبها!!!

وفى جمله فى اغنية لفيروز بندمج معاها قوى بتقول فيها...

(نسم علينا الهوى من مفرق الوادي ياهوى دخل الهوى خدني على بلادي)

خدنى على بلادى !!!

مش هى دى بلادى؟؟؟؟

بحس اول ما بسمع الجمله دى ان مصر وحشانى بجد كأنى فى غربة وكأن مش هى دى بلادى ...!

ماتستغربوش انا فعلا لما بسمعها بتنهد من جوايا كان وطنى واحشنى ...

لأ انا فعلا وطنى واحشنى........

ليه انتمائى للبلد مابحسوش دلوقتى الا لما بتفرج على ماتشات الكورة....

راح فين حنينى لمدرستى واصحابى القدام وللشوارع اللى كنت بس افوت عليها يدق قلبى واترعش ؟

مش عارفة اكمل كملوا.....

قولولى ليه بقيت بحس انى غريبة جوه بلدى بنتظر بفارغ الصبر يوم الرجوع.....؟

سؤال بيوجع قلبى والاجابة بتوجع اكتر ......

مش عارفة ليه!

مش عارفة ليه حاجة فيكم شدتنى جامد خلتنى عايزة اكون واحدة منك
مش عارفة وحدة ولا فراغ او فزلكة ولا غيرة ولا يمكن عجبتونى

ويمكن علشان مرت سنين عمرى وانا بتفرج من بعيد لبعيد على كل حاجة

قضيت حياتى كلها بين فاترينات فقلت اقرب منكم اكتر يعنى برضه اتفرج بس من قريب

يمكن فى يوم الاقى نفسى قادرة اغير حاجة فى او حاجة فيكم مش عارفة ايه ولا فاهمة ليه

لكن اخدت الخطوة دى وناويه لاول مرة فى عمرى اكمل حاجة بدأتها
فرحانة زى الاطفال وحاسة باحساس عمرى ماحسيته

جايز علشان لقيت لنفسى مكان اخيرا بتاعى انا يخصنى انا اقول فيه كل اللى بحسة واعمل فيه اللى انا عايزاه انتقد حاجات فى نفسى وفى اللى حواليا براحتى لاول مرة فى حياتى

واستحملونى هاتشوفوا منى حاجات غريبة وماتقولوش مجنونة لانى عارفة ان كل واحد فيكم بدأ البلوج بتاعة

فى لحظة جنون فى ناس منكم كملت وناس عقلت

المهم

اهلا بيكم فى مرتع الجنون والهلاوس الخاص بى (مدونتى)